San Silvestrea hemen da!!!

Gabonak iada gainean ditugu eta horrekin batera, klasiko bat bilakatzen ari den Donostiako San Silvestrea datorkigu. Aurten polemikaz beteriko edizioa dugu antolakuntzak sarturiko nobedadeak direla eta, baina hala eta guztiz ere gutariko asko bertan izango gara. Izen-emateak nahikoa bizi doaz, hortaz hemendik abisua eman nahi dugu proban parte hartu nahi duena lekurik gabe geratu ez dadin.
Bestalde nire asmoa albiste hau "frexkatzen" joatea da, geure artean egiten diren apustu edota erronkekin, baita lasterketan eramateko asmoa duzuten mozorroekin. Hortaz tentuz Santo Tomas-etan ahoa gehiegi berotzearekin, gero dena idatzita geratuko baita!

Kross Denboraldia hemen da!!!

Lasterketen denboraldia (Ramadan izenaz ere deitua) dagoeneko hemen da. Urtero moduan urrian hasi eta abendurarte asteburuak kirol probetaz beteko dira. Hori dela eta, jarraian datozen asteetan izango diren proba nagusiak gehitzen ditut, norberak beren planning-a egin dezan.

Irailak 18, Igandea - Baxurde Krossa 10,750 km
Irailak 24, Larunbata - Faro de Plata Igoera 5 km
Irailak 25, Igandea - Josetxo Imaz Memoriala 10 km
Urriak 1, Larunbata - Zumaiako Zakila Bira 20 km
Urriak 2, Igandea - Goierri Garaia Herri Lasterketa 8,500 km
Urriak 9, Igandea - 3 Ondartzatako Krossa 10 km
Urriak 16, Igandea - Goierri Garaia Mendi Lasterketa 22 km
Urriak 16, Igandea - 15 km Donostiako Klasikoa 15 km
Urriak 23, Igandea - Donibane Lohitzune-Hondarribia 21,097 km
Urriak 23, Igandea - Ataungo Hiru Auzoetako Krossa 17,300 km
Urriak 30, Igandea - Lasarte-Oria Bai! Kross Herrikoia 10,800 km
Azaroak 5, Larunbata - Aintxintxika Krossa 10 km
Azaroak 13, Igandea - Behobia-Donostia 20 km
Azaroak 26, Larunbata - Azkoitiko Raka Herri Lasterketa 10 km
Azaroak 27, Igandea - Donostiako Nazioarteko Maratoia 42,195 km
Abenduak 31, Larunbata - San Silvestre Donostiarra 8,700 km

Ikusten duzuen moduan bada zer aukeratu. Esan gainera gaurkoan Olano Baxurde Krossan estrenatzen zela, hortaz adi egon beharko gara bere kronikara.

Besterik gabe agur bat eta ea datorren asteetan korrika egiteaz gain bizitza sozialaz ahazten ez garen.

2011 Donostiako Klasika

Urteroko zitari eutsiz gaurkoan ere Jaizkibel-eko maldetara abiatu gara Donostiako Klasikaz gozatu eta izerdi pixka bat botatzera. Aurten tropel handia joan gara argazkietan ikusi dezakezuten moduan, bakoitza bere erritmoan. Pertsonalki sekula baina ikusle gehiago somatu dut errepide bazterrean, giroa paregabea izan delarik. Badirudi Jaizkibel birritan igotzeak jendea animatu duela.
Plano profesionalean, Gilbert izan dugu garaile, izugarrizko poderioz gainera. Argi utzi du Mirakruz-en gora bera zela ahaltsuena, eraso gogor batekin Samu eta konpainia atzean utzirik. Goraipatzekoa neure ustez Haimar Zubeldiaren lasterketa gaur, ausart eta aurpegia emanez aritu baita.

Azkenik esan urteroko legez Klasikaren helmuga lekuz aldatzeaz hitzegin dugula batzuek, eta horren aldeko mugimenduren bat sortzeko asmotan gaude, facebook edota halamodukoez baliatuz. Ideia Boulevard-ean beharren Igeldoko faroan amaitzea litzateke. Ziurrenik erokeria bat izango da, baina ea gutxienez nahi hau antolakuntzaren belarrietara eramaterik dugun. Hortaz pentsatu nola egin dezakegun.

GAME OVER ODON

Oraingoan, umore pixka bat. Ez dakit gutako norbaitek oroitzapenik duen Odonik gabeko Donostia batez. 85/86ko belaunaldiarentzat, bazirudien Donostiaren izaerak elementu batzuk berez lotuak zituela. Kontxako badia, after eight izozkiak su artifizialen azpian, eta Odon.

20 urte eta gero, Donostiako ikur bihurtu da. Donostiako historiaren parte, eta zergatik ez, gure bizitzetako parte. Urteak joan eta urteak etorri, oroitzapenerako irudi andana eskaini dizkigu. Zenbat irri zor dizkiogu burusoil maitagarri honi?

Lau irudi proposatzen dizkizuet hemen. Zein da gehien gustatzen zaizuena? barregarriena? Odon hobekien irudikatzen duena? hitz egin dezala herriak!

Hasi da denboraldi berria

San Silvestre ostean jende ugarik gustoz hartu zuen lasterketa gabeko denboralditxo bat aurretik edukitzea. Herri-krossetan udazkena izan ohi da urteko momenturik garrantzitsuena, batez ere Behobiak duen indarra dela eta, baina udaberriko lasterketak ere indarra hartuz doaz. Klasikoak dira iada Udaberriko Lasterketa eta Hitzak Antiguon antolatzen duena. Baina hauei ere azken aldian ospetsu egin den Donostiako Erdi Maratoia gehitu zaie. Hortaz berriro ere martxan da txapelketa-giroa.
Hau esanik azpimarratu nahiko nuke atzo gure lagun Erregerenatarrek Sagar-Lasterran lehian aritu zirela. Emaitza paregabearekin gainera. Aitor 8. postuan sartu zen, eta Endika berriz 24.. Sailkapena hemen ikus dezakezute. Hernanin ospatzen den proba honek 8,2 km inguru ditu, eta baserri guneetan zein herrian zehar igarotzen da. Giro polita egon ohi dela entzuna dut baina hori beraiek konfirmatu beharko digute.

Ikusi dezakezutenez beraz jendea indartsu hasi da. Ea hurrengoan gehiago animatzen garen!

San Silvestre Donostiarra

Dagoeneko urte amaierako tradizio sendo bilakatzen ari zaigu San Silvestre lasterketa. Urtez urte hazten doan proba da eta ez da sekula girorik falta. Batzuek urtea kontzientzia garbiarekin asmatzeko asmoz, besteak urteko marka egiteko ideiarekin, bakoitzak badu bere arrazoia lasterketa egiteko. Aurtengoan garailea Hossain Kaanache izan da, 26:32ko denbora eginaz. Amaiera oso lehiatua izan da 8 segunduren barnean sartu baitira bigarren eta hirugarren lasterkaria, Pierre Urruty baionarra eta David Martín lasartearra.

Gurean denetik izan dugu, denbora bikaina, txakalaldiak, mozorroak... Denok gutxienez ongi amaitu dugu eta gaua ederki ospatzeko aukera izan dugu. Besterik gabe, hurrengo urtera ediziorarte guztioi!